30:106  prima  fronte  nimis  insolens  ista  Dei  severitas.  Sed  contra  observandum,  adoranda  esse  nobis  summa  cum  reverentia  et  silentio  Dei  iudicia,  quum  occulta  nobis  fuerint,  cavendumque  summopere  ne  illis  obloquamur.  Nam  audacia  nostra  semper  contundetur,  et  nihil  promovebimus  nostra  curiositate  perscrutantes  quae  adorare  nos  oportet:  sed  potius  summam  confusionem  in  nos  pertrahemus.  Denique  ut  paucis  rem  totam  complectar  esto  ratum  istud  axioma,  Deum,  licet  severe  agat,  esse  tamen  semper  iustissimum  et  aequissimum:  et  si  iudiciorum  ipsius,  propter  stuporem  nobis  innatum,  ratio  non  constet,  tamen  statuendum  sine  concertatione  esse  aequissima,  et  aequitate  ac  rectitudine  omnia  constare.  Interim  hanc  doctrinam  ad  usum  nostrum  revocemus,  nempe  Deo  maleficium  aliquod  condemnante,  non  esse  nostrum  adversus  Deum  obloqui,  et  in  eius  iudicia  inquirere,  quasi  maiores  illo  simus,  ne  summo  nostro  periculo  id  contingat.  Quid  misero  illi  Achabo  contigerit  notum  est,  postquam  acceptis  a  Deo  mandatis  de  Syris  exstirpandis,  sponte  tamen  cum  Benhadado  pacem  iniit,  contentus  cum  inimicis  pacem  facere.  Sed  missus  ad  eum  a  Domino  propheta,  Dei  iudicium  ipsi  imminens  propter  contumaciam  aperuit,  sed  addito  signo,  quo  miser  ille  Achab  Dei  iudicia  quasi  iam  ante  oculos  posita  metueret.  Quare  phropheta  Dei  nomine  accepto  sponte  in  facie  vulnere  ad  regem  pervenit  Deique  mandata  pertulit:  Quandoquidem,  ait,  iussus  regem  Syrorum  interficere,  maluisti  vivum  reservare,  pacemque  cum  illo  inire,  quam  Deo  parere,  ut  vides  me  vulneratum,  ita  scito  te  tuumque  etiam  populum  ab  eo  quem  dimisisti  vulnerandum.  Quare  vero  propheta  ille  vulnus  in  se  ultro  recepit?  quare  se  hoc  habitu  regi  obtulit?  Nempe,  ut  ostenderet  Deo  man  dan  ti  sine  ulla  contradictione  obtemperandum.  Ac  proinde  quum  Deus  blasphemum  illum  Syrorum  regem  Benhadadum  interfici  iussisset,  oportuisse  vindictam  de  illo  fieri,  et  ex  Dei  mandato  morti  dari.  Quae  quum  a  rege  Achabo  non  sint  ex  Dei  voluntate  perfecta,  in  ipsum  etiam  damnum  recisurum.  Quod  exemplum  cum  isto  de  quo  nunc  agimus  convenit,  Deus  enim  vocat  Amalecitas  peccatores.  Minime  quidem  quod  qui  tum  vivebant  in  Israelitas  iniurii  fuissent  et  crudeles,  aut  quod  eos  itinere  prohibere  tentassent,  et  a  possessione  terrae  quam  Deus  ipsis  dederat  excludere  :  neque  enim  tum  quum  id  contigit,  isti  nati  erant.  Sed  nihilominus  Deus  vult  in  iis  qui  tum  vivebant  patrum  ingratitudinem  ulcisci  :  quemadmodum  Deus  etiam  minatur,  se  in  tertiam  et  quartam  usque  generationem  improborum  ulturum  sui  contemptum.  Qua  in  re  tamen  iustissimus  et  aequissimus  fuit  iudex  :  quis  enim  obsecro,  ex  tanta  illa  multitudine  suam  apud  Deum  innocentiam  tuebitur?  Quandoquidem  igitur  certum  est  omnes  a  maximo  ad  mi-