27:106  vrions-nous  faire?  N'est-ce  pas  pour  le  moins  que  nous  devrions  dire:  Et  bien  Seigneur,  nous  regarderons  a  toy.  Mais  au  contraire  ayans  prins  les  benefices  de  sa  main,  nous  venons  a  regimber  a  l'encontre  de  luy  :  il  nous  veut  prendre  et  recevoir  en  sa  protection,  et  nous  venons  a  nous  esgarer  a  travers  champs.  Et  puis  ou  est  la  solicitude  que  nous  devrions  avoir  pour  l'invoquer?  Car  il  nous  faudroit  regarder:  Or  ca,  nostre  Seigneur  nous  tient  comme  en  suspend,  afin  que  nous  cheminions  en  crainte,  que  nous  ne  laschions  point  la  bride  a  nos  appetis:  comme  si  un  pere  disoit  a  ses  enfans:  Or  ca,  advisez  de  profiter,  l'un  a  l'eschole,  l'autre  a  sa  besongne,  et  cependant  vous  aurez  a  disner:  mais  autrement  vous  n'aurez  rien.  Si  le  pere  tient  ainsi  ses  enfans,  qu'ils  ne  sachent  que  c'est  qu'ils  devront  ne  boire  ni  manger,  si  on  ne  les  voit  profiter:  il  est  certain  que  cela  les  esmeut,  encores  qu'il  n'y  ait  ni  raison  ni  intelligence.  Or  voici  nostre  Dieu  qui  nous  pourroit  bien  du  premier  coup  bailler  tout  ce  qu'il  nous  faut,  ou  bien  en  un  iour  il  nous  pourroit  declarer  que  l'annee  sera  heureuse,  qu'il  y  aura  bonne  moisson,  bonne  vendange:  mais  il  ne  le  veut  point  faire.  Quand  nous  aurons  passe  un  iour,  il  faut  recommencer  l'autre  a  le  prier:  et  il  ne  fait  point  cela,  sinon  qu'il  voit  bien  qu'il  est  plus  que  necessaire,  que  nous  soyons  tenus  en  bride.  Et  ainsi  advisons  de  faire  nostre  profit  de  ceste  doctrine:  et  toutes  fois  et  quantes  que  la  pluye  nous  deffaut,  que  nous  advisions  d'estre  patiens,  en  attendant  paisiblement  que  Dieu  ouvre  les  cieux.  Et  au  reste,  quand  ii  luy  plaist  d'arouser  la  terre,  cognoissons  que  c'est  de  sa  propre  main  qu'il  nous  donne  nourriture,  et  que  nous  l'invoquions  iournellement:  et  quand  nous  aurons  cogneu  qu'il  veille  pour  nous,  que  nous  regardions  mutuellement  a  luy.  Voila  en  somme  ce  que  Moyse  a  ici  voulu  declairer.  Or  il  adiouste  quant  et  quant:  Si  vous  gardez  les  commandemens  que  ie  vous  propose,  pour  aimer  vostre  Dieu,  et  le  servir  de  tout  vostre  coeur  en  la  terre  que  ie  vous  donneray.  Ici  Moyse  encores  reduit  en  memoire  au  peuple,  quel  est  le  vray  service  de  Dieu:  c'est  que  nous  apprenions  a  luy  obeir.  Cela  a  desia  este  suffisamment  expose:  mais  ce  n'est  point  sans  cause  que  le  S.  Esprit  en  parle  tant  de  fois:  pource  que  nous  avons  besoin  que  telle  admonition  nous  soit  remise  au  devant  quasi  a  chacune  minute.  Et  qu'ainsi  soit:  comment  est-ce  que  nous  servons  a  Dieu,  sinon  d'une  crainte  forcee?  Il  n'y  a  nulle  affection,  ni  desir.  Or  nostre  Seigneur  declaire,  qu'il  n'acceptera  nul  service  qui  luy  soit  rendu,  sinon  qu'il  procede  du  coeur,  et  que  nous  l'aimions  aussi  comme  nostre  pere:  comme  il  est  dit  au  Pseaume,  que  nous  ne  pouvons  point  craindre  Dieu,  sinon  d'autant  qu'il  se  declaire  propice  en-