22:106  sance  de  leurs  pechez  et  delivrant  ceux  qui  en  ont  desplaisir  en  les  restituant  a  la  clemence  divine.  Le  maistre.  Quelle  utilite  te  vient  de  ce?  Lenfant.  Par  cela  il  sensuyt  que  ie  recois  voluntiers  la  punition  et  peine  qui  m'est  ordonnee,  que  ie  admoneste  diligemment  mon  prochain  et  que  i'aye  en  grand'  estime  la  discipline  de  leglise,  que  i'en  face  voluntiers  mon  proffit.  Le  maistre.  Ce  faict  il  davantaige  autre  chose  en  leglise?  Lenfant.  Ouy,  c'est  asscavoir  la  Cene  du  Seigneur.  Le  maistre.  Qu'est  ce  que  la  Cene  du  Seigneur.  Lenfant.  Cest  la  vraye  communication  du  corps  et  du  sang  de  nostre  seigneur  Ihesu  Christ,  laquelle  nous  est  representee  par  le  pain  et  calice  du  Seigneur.  Le  maistre.  Qui  sont  ceux  qui  doibvent  user  de  ce  sacrement?  Lenfant.  Tous  ceux  qui  ont  espoir  en  Christ  et  qui  desirent  estre  ses  disciples.  Le  maistre.  Sens  tu  par  cela  aulcun  amendement  de  vie?  Lenfant.  Ouy  et  non  sans  cause  i'estime  estre  grande  chose  de  ce  que  nous  avons  este  delivrez  par  Christ  nostre  seigneur,  que  nous  sommes  conioinctz  et  prenons  nourriture  et  croissance  a  son  corps,  duquel  ie  suis  faict  certain  par  ce  sacrement,  cest  asscavoir  que  sa  vie  est  espandue  en  moy,  et  que  la  mienne  est  mise  en  la  sienne,  et  ne  le  scay  pas  seulement  mais  aussi  ie  sens  l'augmentation  de  ce  bien  en  moy.