44:105  105  CAPUT  II.  106  vestri  plenam  illam  restitutionem,  de  qua  toties  concionati  sunt  prophetae.  Sed*  merito  apostolus  evangelium  hic  dicit  legi  opponi,  quia  Deus  exseruit  mirificam  virtutem,  quum  lex  promulgata  fuit  in  monte  Sinai:  plenior  tamen  virtus  refulsit  in  Christi  adventu,  quia  tunc  simul  cum  terra  coelum  concussum  est.  Ideo  non  abs  re  colligit  apostolus  Deum  nunc  e  coelo  nobiscum  loqui,  quia  maiestas  eius  splendidior  apparet  in  evangelio,  quam  olim  in  lege  :  ideoque  minus  sumus  excusabiles  si  contemnimus  nunc  loquentem  in  persona  unigeniti  filii  sui,  et  ita  loquentem  ut  ostendat  sibi  totum  orbem  subiectum  esse.  Postea  adiungit,  Commovebo  gentes  omnes,  et  venient.  Postquam  coeli  et  terrae  meminit,  iam  ostendit  se  animos  omnium  mortalium  tenere,  ita  ut  eos  flectat  pro  suo  arbitrio  quocunque  volet:  Venient,  inquit,  omnes  gentes.  Quare?  Nam  eas  concutiam.  Hic  rursum  docet  propheta  non  accedere  homines  ad  Christum,  nisi  mirabili  Dei  impulsu.  Poterat  simplicius  loqui,  adducam  gentes  omnes,  quemadmodum  alibi:  sed  voluit  plus  aliquid  exprimere,  nempe  hunc  motum  quo  Deus  impellit  electos  suos,  ut  sese  in  ovile  Christi  conferant,  esse  supernaturalem.  Concussio  videtur  violenta.  Ergo  ne  homines  obscurent  virtutem  Dei,  qua  excitantur  ut  obediant  Christo  et  sese  subiiciant  imperio  eius,  hic  notatur  a  propheta  hoc  elogio,  ut  sentiant  non  usitato  neque  vulgari  modo  Dominum  agere,  ubi  ita  mutantur.  Sed  interea  notandum  est,  sic  violenter  et  extraordinario  vel  supernaturali  modo  impelli  homines,  ut  tamen  sponte  sequantur.  Duplex  igitur  est  opus  Dei.  Nam  primo  necesse  est  concuti  homines,  ut  dediscant  totum  suum  ingenium,  hoc  est,  ut  obliti  prioris  naturae  libenter  recipiant  iugum  Christi.  Scimus  enim  qualis  sit  nostra  contumacia,  et  quam  simus  indomiti,  donec  spiritu  suo  nos  Deus  subigat.  Hic  necesse  est  fieri  violentam  concussionem:  sed  interea  non  cogimur,  ut  pareamus  Christo,  quemadmodum  leones,  et  ferae  bestiae,  quae  cedunt  quidem,  sed  intus  retinent  suam  ferociam,  et  fremunt  dum  trahuntur  catenis,  et  subiguntur  vel  flagellis,  vel  baculis.  Non  ergo  sic  concutimur,  ut  maneat  interior  quaedam  in  nobis  rebellio,  sed  concutimur  ut  mutemus  animos,  et  sponte  recipiamus  iugum  Christi.  Haec  ratio  est  cur  dicat  propheta,  Concutiam  omnes  gentes  et  venient,  hoc  est,  erit  quidem  haec  admirabilis  conversio,  quum  gentes  quae  prius  Deum  spernebant,  quibus  etiam  summo  odio  erat  vera  religio  et  pietas,  sese  assuefacient  ad  imperium  Dei.  Venient  autem,  quia  sic  trahentur  arcano  impulsu,  ut  tamen  voluntarium  sit  obsequium  quod  praestabunt.  Nunc  tenemus  consilium  prophetae.  Postea  adiungit,  Desiderium  omnium  gentium.  Potest  hoc  duobus  modis  exponi,  vel  quod  gentes  accedent,  et  simul  afferent  quidquid  pretiosum  est,  ut  consecrent  ad  cultum  Dei.