7:104  cens  ans,  et  qui  avoyent  este  confonduz  par  la  parolle  de  Dieu.  Toutesfoys,  comme  i'ay  proteste  du  commencement,  ie  ne  veux  point  que  cela  preiudicie  en  rien  a  leur  cause,  sinon  que  ie  les  aye  premierement  convaincuz  par  la  pure  parolle  de  Dieu,  comme  si  iamais  les  hommes  n'en  avoyent  parle.  Ce  que  i'en  dy  est  seulement  pour  advertir,  afin  que  chascun  sache  de  quelle  origine  est  procede  ce  que  les  Anabaptistes  mettent  a  present  en-avant,  comme  s'il  leur  avoit  este  n'a  guere  revele  du  ciel.  Et  mesme  pour  les  advertir  aussi  bien  eux.  Car  tous  les  plus  grans  docteurs  qui  ayent  este  en  leur  secte  ont  este  si  ignorans  des  histoires  et  de  toute  anciennete,  que  ie  ne  pense  pas  que  nul  d'eux  ait  iamais  sceu  que  vouloit  dire  le  nom  de  Marcion.  Il  est  donc  bon  que  tant  eux,  que  les  autres  soyent  advertiz,  que  le  premier  autheur  de  ceste  opinion,  [page  113]  dont  ilz  brouillent  auiourd'huy  le  monde,  a  este  reiecte  et  anathematize  avec  icelle,  non  pas  de  quelque  nombre,  mais  universellement  de  toute  l'Eglise  Chrestienne,  tantost  apres,  c'est  a  dire  environ  quarante  ans  apres  la  mort  des  Apostres.  Car  Eusebe  et  sainct  Hierome  racomptcnt  que  Polycarpe,  qui  avoit  este  disciple  et  familier  de  sainct  Iehan  l'Apostre,  l'ayant  rencontre  a  Rome,  l'appella  filz  aisne  de  Sathan.  Ie  laisse  les  autres  erreurs,  dont  il  a  trouble  l'Eglise.  Car  quand  cestuy  cy  aura  este  bien  espluche,  on  congnoistra,  comme  i'espere,  qu'a  grand'  peine  en  pourroit-on  trouver  un  plus  execrable.  Pour  le  premier  ie  monstreray,  par  plusieurs  et  trescertains  tesmoignages  de  l'escriture,  comme  nostre  Seigneur  Iesus  a  prins  vrayement  nostre  chair  et  nature  humaine,  quand  il  nous  a  este  revele  de  Dieu  son  Pere  en  ce  monde:  et  le  monstreray  tant  evidemment,  qu'il  n'y  aura  si  petit  enfant  qui  ne  congnoisse,  que  ce  seroit  trop  grande  impudence  aux  Anabaptistes  de  tergiverser  plus  outre.  Combien  qu'il  ne  sera  ia  mestier  d'assembler  tous  les  passages  qui  serviroyent  a  ce  propos.  Ainsi  pour  eviter  prolixite,  i'eliray  ceux  qui  me  sembleront  les  plus  convenables.  Nous  savons  que  [page  114]  dez  le  commencement  du  monde  nostre  Seigneur  promit  a  Heve,  que  sa  semence  auroit  victoire  par  dessus  le  Serpent  (Gen.  3,  15).  Regardons  si  cela  est  accomply  en  nous,  ou  s'il  a  iamais  este  accomply  en  homme  mortel,  sinon  par  le  moyen  de  Iesus  Christ,  qui  a  vaincu  pour  nous  et  surmonte  Sathan.  Mais  pource  que  ceste  promesse  estoit  encore  aucunement  obscure,  elle  a  este  beaucoup  plus  clarifiee  depuis:  tant  a  Abraham  (Gen.  12,  3)  qu'a  Iacob  (Gen.  28,  14),  quand  il  leur  a  este  dict,  qu'en  leur  semence  seroyent  benictes  toutes  nations  de  la  terre.  Or  ceste  semence,  comme  sainct  Paul  l'interprete  (Gal.  3,  16),  et  la  raison  le  demonstre,  est  Iesus  Christ.  La  promesse  donc  ne  peut  autrement