6:104  PUER.  Minime.  Sic  enim  iam  gratuita  remissio  non  foret,  nec  sola  Christi  satisfactione,  qua  in  cruce  pro  nobis  defunctus  est,  sicuti  par  est,  fundata.  Verum,  quia  irrogatas  nobis  iniurias  obliviscendo,  dum  eius  clementiam  ac  bonitatem  imitamur,  re  ipsa  nos  eius  filios  esse  demonstramus:  [fol.  64]  hac  ideo  tessera  confirmare  nos  voluit,  et  simul  ex  adverso  ostendere,  nisi  faciles  nos  ad  ignoscendum  et  flexibiles  praebuerimus,  nihil  esse  aliud  a  se  expectandum,  quam  summum  et  inexorabilem  severitatis  rigorem.  MINISTER.  Hic  ergo  abdicari  a  Deo,  expungique  filiorum  loco  dicis  omnes,  qui  offensiones  ex  animo  deponere  non  possunt:  ne  quem  sibi  in  coelo  veniae  locum  fore  confidant.  PUER.  Ita  sentio:  ut  impleatur  illud,  remensum  cuique  iri  eadem  mensura,  qua  erga  alios  usus  fuerit.  MINISTER  Quid  postea  sequitur?  PUER.  Ne  nos  Dominus  in  tentationem  inducat,  sed  a  malo  potius  liberet.  MINISTER.  Hoc  totumne  in  unam  petitionem  includis?  PUER.  Non  nisi  una  est  petitio.  Posterius  enim  membrum  prioris  explicatio  est.  MINISTER.  Quid  summatim  continet?  PUER.  Ne  ruere  nos,  aut  labi  in  peccatum  Dominus  sinat;  ne  diabolo  nos,  carnisque  nostrae  cupiditatibus,  quae  assiduum  nobiscum  bellum  gerunt,  vincendos  permittat:  quin  potius  sua  nos  ad  resistendum  virtute  instruat,  sustineat  nos  manu  sua,  praesidio  suo  muniat  ac  tegat:  ut  ita  sub  fide  tutelaque  eius  in  tuto  habitemus.  MINISTER.  Quo  autem  modo  id  fit?  PUER.  Quum  eius  spiritu  gubernati,  tali  iustitiae  amore  desiderioque  imbuimur,  quo  peccatum,  carnem  et  Satanam  superemus:  tali  rursum  odio  peccati,  quod  nos  a  mundo  segregatos  in  pura  sanctitate  [fol.  65]  contineat.  In  spiritus  enim  virtute  victoria  nostra  consistit.  MINISTER.  Habentne  omnes  opus  hoc  auxilio?  1)  Le  43  dimanche.  .  La  sixiesme  requeste.  .  Tentation.