58:104  Ainsi  donc  nous  avons  bien  occasion  de  baisser  tous  les  yeux,  et  cognoistre  que  quand  nous  cuiderons  avoir  bien  profite  en  l'escole  de  Dieu,  nous  serons  encore  bien  loin  de  nostre  but.  Et  de-faict,  il  nous  sera  bien  aise,  quand  nous  serons  loin  de  tous  combats,  d'estre  les  plus  vaillans  du  monde:  mais  quand  ce  vient  a  iouster  de  pres,  nous  voila  tous  effraiez.  Ainsi  donc,  cognoissons  qu'il  n'y  a  celui  qui  n'ait  besoin  de  prier  iournellement  que  Dieu  lui  augmente  la  Foy,  corrigeant  le  residu  de  son  incredulite.  Voila  pour  un  item.  Or  la  dessus  nous  avons  aussi  un  bon  advertissement  :  C'est,  que  quand  il  nous  avient  quelque  peril,  ou  que  nous  craignons  de  tomber  en  quelque  mal  :  c'est  comme  si  une  nuee  nous  esblouissoit  les  yeux,  tellement  que  nous  ne  savons  que  devenir,  nous  n'avons  point  de  conseil  certain,  et  les  plus  sages  sont  ici  surpris.  Ne  presumons  point  d'estre  subtils  et  aigus:  et  d'avoir  une  telle  promptitude,  que  nous  estimions  que  tousiours  nous  serons  forts  et  robustes,  que  nous  serons  alegres  en  nos  coeurs,  que  nous  aurons  les  remedes  en  nostre  cerveau:  quand  il  nous  aviendra  quelque  fascherie,  gardons-nous  d'une  telle  arrogance:  mais  cognoissons  que  Dieu  a  en  soy  Esprit  de  conseil  et  de  prudence,  et  recourons  a  lui.  Et  quand  nous  serons  comme  empressez  et  que  nous  ne  pourrons  pas  nous  resoudre  du  premier  coup,  que  nous  ne  soions  pas  comme  ceux  qui  forgent  et  bastissent  tousiours  des  discours  nouveaux  :  mais  allons  a  Dieu,  et  prions  le  qu'il  nous  esclaire  au  milieu  des  tenebres  :  et  mesmes  n'attendons  pas  que  nous  soions  du  tout  pressez:  mais  cognoissons  la  rudesse  qui  est  en  nous.  Et  puisque  nous  n'avons  pas  telle  fermete  a  beaucoup  pres,  comme  il  seroit  requis,  que  de  matin  et  de  soir  nous  prions  Dieu  qu'il  nous  guide,  et  qu'il  nous  monstre  ce  que  nous  avons  a  faire.  Voila  donc  ce  que  nous  avons  a  retenir  en  l'exemple  dlsaac.  Or  ici  on  pourroit  demander,  s'il  y  a  eu  si  grande  faute,  veu  qu'il  n'a  point  menti  :  car  nous  avons  veu  ci  dessus,  que  Rebecca  estoit  sa  cousine.  Il  pouvoit  donc  dire,  C'est  ma  soeur:  car  ce  mot  en  la  langue,  emporte  autant  que  Ma  parente.  Il  n'est  pas  question  ici  d'un  premier  degre,  ne  second.  Ainsi  Isaac  n'use  point  de  mensonge,  en  disant  que  Rebecca  est  sa  soeur.  Or  tant  y  a  qu'il  a  failli.  Voire:  car  Dieu  n'est  point  Sophiste,  et  ne  s'amuse  point  a  un  mot  (comme  nous  avons  declare  par  ci  devant)  :  mais  il  regarde  a  l'intention.  Quand  donc  nous  aurons  bien  farde  nos  propos,  et  qu'il  y  aura  quelque  belle  couleur  et  apparence,  pour  nous  absoudre  devant  les  hommes,  ce  n'est  point  le  tout  :  car  Dieu  sonde  les  coeurs.  Et  quand  les  hommes  ne  trouveront  que  redire  en  nos  excuses,  toutefois  ce  n'est  pas  que  Dieu  s'en  contente.  Et  c'est  une  bonne  admonition  et  utile,  que  ceste-ci.  Car  comment  est-ce  qu'on  se  ioue  ordinairement  avec  Dieu?  Il