52:104  quae  non  perducunt  ad  solidam  doctrinam.  Alii  accipiunt  in  proprio  significatu  pro  rebus  externis  et  corruptioni  subiectis,  quae  nihil  ad  Dei  regnum  faciunt.  Prior  expositio  magis  arridet:  sicut  et  ad  Galatas  capite  4,  3.  9.  Quoniam  in  ipso  habitat  Ratio  cur  non  conveniant  cum  Christo  elementa  illa  mundi,  quae  traduntur  ab  hominibus.  Sunt  enim  additamenta  ad  supplendum  defectum,  ut  loquuntur.  Atqui  in  Christo  est  perfectio,  cui  nihil  addi  potest.  Ergo  quidquid  ex  se  admiscent  homines,  pugnat  cum  natura  Christi,  quia  eum  damnat  imperfectionis.  Solum  hoc  argumentum  sufficiet  ad  refellenda  omnia  papistarum  figmenta.  Quorsum  enim  spectant,  nisi  ut  perficiant  quod  est  a  Christo  inchoatum?  Atqui  haec  minime  est  ferenda  in  Christum  contumelia.  Ipsi  quidem  causantur  se  nihil  Christo  addere:  quia  sint  quasi  pars  Christianismi,  quae  evangelio  attexuerunt.  Sed  non  effugiunt  eiusmodi  cavillo.  Nam  Paulus  non  de  imaginario,  sed  de  praedicato  Christo  loquitur,  qui  se  per  certam  doctrinam  revelavit.  Porro  quum  dicit,  plenitudinem  deitatis  habitare  in  Christo,  nihil  aliud  sibi  vult  quam  totum  Deum  in  ipso  inveniri:  ut  aliquid  Deo  melius  ac  praestantius  appetat,  qui  solo  Christo  non  est  contentus.  Summa  est,  quod  Deus  in  Christo  se  nobis  plene  atque  in  solidum  exhibuerit.  Adverbium  corporaliter  varie  exponunt  interpretes.  Ego  improprie  positum  non  dubito,  pro  substantialiter.  Opponit  enim  hanc  Dei  manifestationem?  quam  habemus  in  Christo,  reliquis  omnibus  quae  unquam  fuerunt.  Deus  enim  saepius  se  exhibuit  hominibus,  sed  in  parte.  In  Christo  autem  totum  se  nobis  communicat.  Alias  etiam  se  manifestavit,  sed  in  figuris,  aut  virtute  et  gratia.  In  Christo  autem  essentialiter  nobis  apparuit.  Ita  impletur  illud  Iohannis:  Qui  habet  filium,  habet  et  patrem.  Deum  enim  habent  vere  praesentem,  ipsoque  penitus  fruuntur  qui  Christum  possident.  10.  Et  estis  in  ipso  completi.  Addit  perfectam  illam  deitatis  essentiam,  quae  est  in  Christo,  in  hoc  nobis  prodesse,  ut  in  eo  nos  quoque  perfecti  simus:  ac  si  diceret:  Quod  totus  Deus  ia  Christo  residet,  ideo  est  ut  ipsum  adepti  solidam  in  ipso  perfectionem  possideamus.  Duplicem  ergo  iniuriam  Deo  faciunt  qui  non  acquiescunt  in  solo  Christo.  Nam  praeter  id  quod  Dei  gloriae  derogant,  aliquid  supra  eius  perfectionem  appetendo,  sunt  etiam  ingrati,  quod  aliunde  quaerunt  quod  iam  in  Christo  habent.  Non  intelligit  tamen  Paulus,  Christi  perfectionem  in  nos  transfundi,  sed  in  ipso  esse  quo  expleamur,  ita  ut  nihil  amplius  nobis  desit.  Qui  est  caput  Hanc  particulam  rursus  inseruit  propter  angelos,  significans  angelos  quoque  nostros  fore,  si  Christum  habuerimus.  Terum  de  hac  re  postea.  Sed  interim  tenendum  est,  sursum  et  de-