22:104  Le  maistre.  Quel  fruict  sensuivra  en  toy  de  ceste  foy?  Lenfant.  Tel  que  ie  doibs  avoir  tousiours  peche  en  horreur,  que  ie  le  doibs  fuyr,  que  ie  doibs  demander  et  acquerir  la  vie  eternelle  par  la  seulle  mort  et  resurrection  du  Seigneur  Ihesus  et  que  du  tout  ie  m'abandonne  a  luy  comme  a  celuy  qui  est  le  Roy  et  prince  celeste.  Le  maistre.  Quelle  est  la  tierce  partie  de  ceste  confession  chrestienne?  Lenfant.  Ie  croy  au  sainct  Esprit,  la  saincte  eglise  catholique,  la  communion  des  sainctz,  la  remission  des  pechez,  la  resurrection  de  la  chair,  la  vie  eternelle.  Amen.  Le  maistre.  Que  confesses  tu  en  ces  parolles?  Lenfant.  Que  le  sainct  Esprit  est  celuy  par  lequel  nous  sommes  regenerez  et  sommes  comme  plantez  en  l'eglise  en  laquelle  nous  acquerons  pardon  des  pechez  et  amendement  de  vie  et  apres  ceste  vie  sommes  consolez  par  lattente  de  la  vie  eternelle.  Le  maistre.  Quelle  utilite  as  tu  de  ceste  foy  et  profession?  Lenfant.  Afin  que  ie  prie  Dieu  incessamment  pour  impetrer  son  sainct  Esprit,  que  ie  aylle  voluntiers  en  lassemblee  des  chrestiens  en  laquelle  ie  doibs  cercher  et  prendre  consolation  et  correction  de  vie,  affin  qu'avecques  plus  grande  certitude  i'attende  la  resurrection  et  vie  eternelle.  Le  maistre.  Comment  es  tu  venu  en  ceste  communion  de  leglise  ?  Lenfant.  Par  le  Baptesme.