50:102  conservat.  Et  alibi  (Deut.  8,  3)  rursum  admonet  Moses,  tali  victu  fuisse  nutritos  ad  tempus,  ut  discerent  non  ali  homines  sua  industria  aut  labore,  sed  benedictione  Dei.  Hinc  apparet,  in  manna  tanquam  in  speculo  nobis  exhiberi  imaginem  ordinarii  victus  quo  pascimur.  Iam  veniamus  ad  locum  quem  Paulus  adducit.  Postquam  man  deciderat,  iubebantur  colligere  in  acervos  quantum  quisque  posset.  Tametsi  autem,  ut  alii  sunt  aliis  agiliores,  aliqui  plus  quam  in  quotidianum  usum  necesse  erat,  colligerent,  alii  minus  :  nemo  tamen  sibi  in  privatum  usum  sumebat,  plus  quam  homer.  Modus  enim  ille  a  Domino  praescriptus  erat.  Quum  ita  fieret,  suppetebat  omnibus  quantum  sufficeret,  et  nemo  esuriebat.  Hoc  habetur  Exodi  16,  18.  Nunc  historiam  accommodemus  ad  Pauli  institutum.  Neque  homer,  neque  alia  mensura  nobis  ordinata  est  a  Domino,  ad  quam  uniuscuiusque  diei  victus  exigatur:  sed  nobis  commendata  est  frugalitas  et  temperantia:  et  prohibitum  ne  quis  abundantia  fretus  lasciviat.  Ergo  quibus  sunt  divitiae,  sive  ex  patrimonio  relictae,  sive  industria  partae  et  laboribus,  illi  cogitent  excessum  non  intemperantiae  aut  luxuriae  destinatum  esse,  sed  tolerandae  fratrum  egestati.  Manna  enim  est  quidquid  habemus,  undecunque  proveniat:  modo  vere  nostrum  sit.  Quia  fraude  et  illicitis  artibus  quaesitae  opes  indignae  sunt  hoc  nomine:  sed  potius  sunt  coturnices  ab  ira  Dei  emissae.  Et  quemadmodum  si  quis  vel  aviditate  nimia,  vel  diffidentia  man  suppresserat,  illud  repositum  statim  putrescebat:  ita  non  dubitemus  maledictas  esse  divitias,  et  mox  perituras,  quae  cum  fratrum  iniuria  congeruntur:  idque  cum  exitio  domini,  ne  putemus  hanc  crescendi  esse  rationem,  si  prospicientes  nobis  in  longum  tempus,  egenos  fratres  nostros  fraudamus  debita  beneficentia.  Fateor  quidem  non  praecipi  nobis  illam  aequalitatem,  ut  nihilo  nitidius  fas  sit  divitibus  vesci  quam  pauperibus:  sed  eatenus  servanda  aequalitas,  ut  nemo  esuriat,  nemo  abundantiam  suam  supprimat,  alios  fraudando.  Pauperum  homer  panis  erit  cibarius,  victusque  parcior:  divitum  homer  liberalior  quidem  portio,  prout  tulerit  facultas:  sic  tamen  ut  temperanter  vivant,  neque  desint  aliis.  16.  Gratia  autem  Deo,  qui  dedit  Ne  quam  relinquat  excusationem  Corinthiis,  nunc  demum  adiungit  datos  illis  strenuos  instigatores,  quibus  curae  sit  negotium.  Ac  primo  quidem  Titum  nominat,  quem  divinitus  excitatum  fuisse  dicit.  Quod  magni  ad  causam  intererat.  Eo  enim  efficacior  futura  erat  legatio,  si  agnoscerent  Corinthii,  venisse  ipsum  Dei  impulsu.  Ex  hoc  tamen  loco,  sicuti  ex  aliis  innumeris,  colligimus,  nullos  esse  pios  motus  qui  non  a  spiritu  Dei  proficiscantur  :  deinde  hoc  testimonium  esse  divinae  erga  suos  sollicitudinis,  quod  ministros  et  curatores  excitat,  qui  subvenire  illorum  necessi-  7*