23:102  24.  Septuplo  vindicabitur  Cain.  Mihi  non  est  propositum  referre  singulorum  deliria,  vel  somnia:  nec  volo  hoc  a  me  exspectent  lectores.  Alicubi  breviter  attingam  et  parce,  maxime  si  quis  erit  ad  fallendum  praetextus:  ut  sibi,  aliquoties  admoniti,  perpetuo  cavere  discant  lectores.  Ergo  quantum  ad  hunc  locum  spectat  qui  varie  discerptus  fuit,  non  referam  quid  hic  vel  ille  tradiderit,  sed  germana  expositione  contentus  ero.  Deus  voluerat  Cain  horribile  aliis  fugiendi  homicidii  esse  exemplum,  in  hunc  finem  eum  foedo  stigmate  notaverat.  Ne  quis  tamen  eius  scelus  imitaretur,  septuplo  gravius  puniendum  esse  dixerat  quisquis  eum  occideret.  Hanc  Dei  sententiam  impie  pervertens  Lamech,  illius  severitati  illudit:  nam  inde  arripit  maiorem  peccandi  licentiam  :  ac  si  Deus  homicidas  singulari  aliquo  privilegio  donasset:  non  quod  serio  ita  sentiat,  sed  quia  vacuus  omni  pietatis  sensu  impunitatem  sibi  promittit,  ac  interea  per  iocum  obtendit  Dei  nomen:  ut  Dionysius  ille,  quum  deos  favere  sacrilegis  iactaret,  diluendae  quam  contraxerat  infamiae  causa.  Caeterum  sicut  numerus  septenarius  in  scriptura  multitudinem  designat:  ita  septuplicatio  pro  ingenti  incremento  capitur.  Talis  est  illa  Christi  sententia  :  Non  dico  ut  septies  remittas  offensam  fratri  tuo,  sed  septuagies  septies.  (Matth.  18,  21.)  Cognovit  Adam  uxorem.  Colligunt  hinc  quidam  orbatos  fuisse  tunc  sobole  primos  homines,  quum  alter  ex  filiis  esset  occisus,  alter  procul  in  exsilium  eiectus  foret.  Atqui  nequaquam  credibile  est,  quum  maxime  vigeret  Dei  benedictio  in  propagatione  humani  generis,  Adam  et  Hevam  per  tot  annos  fuisse  steriles.  Quin  potius  antequam  occideretur  Abel,  continua  prolis  successio  iam  populosam  Adae  domum  effecerat:  nam  in  ipso  praesertim  et  uxore  sententiae  illius  effectum  fulgere  oportuit:  Crescite  et  multiplicamini,  donec  repleatis  terram.  Quid  igitur  sibi  vult  Moses?  Nempe  primos  homines  nefandae  caedis  horrore  perculsos,  a  thoro  coniugali  aliquamdiu  abstinuisse.  Neque  certe  aliter  fieri  potuit  quin  illum  plusquam  tristem  et  acerbum  suae  a  Deo  apostasiae  fructum  colligendo,  fere  exanimes  iacerent.  Quod  autem  alios  nunc  praeterit,  ratio  est,  quia  piorum  generationem  ex  linea  Seth  prosequi  instituerat.  Proximo  autem  capite,  ubi  dicet  Adam  genuisse  filios  et  filias,  complectitur  haud  dubie  plurimos  qui  ante  Seth  nati  erant:  quorum  tamen  non  magna  habetur  ratio,  quoniam  separati  fuerunt  ab  ea  familia  quae  pure  Deum  coluit,  et  vere  censeri  potuit  Dei  ecclesia.  Posuit  mihi  Deus  semen  alterum  pro  Abel.  Semen  aliquod  intelligit  singulare:  diximus  enim  procreatos  fuisse  alios  qui  iam  ante  mortem  Abel  adoleverant:  verum  ut  proclive  est  hominum  genus  ad  mala,  tota  fere  domus  se  variis  modis  corruperat.  Ideo  exiguam  spem  de  reliqua  turba  conceperat  7*