27:101  101  SUR  LE  DEUTER.  CHAP.  XI.  102  c'est  la  aussi  ou  nostre  Seigneur  nous  attire:  cependant  il  met  la  vie  presente  comme  accessoire.  Or  cela  a  este  fait,  d'autant  qu'auiourd'huy  nous  avons  une  clarte  plus  ample  que  n'ont  pas  eu  les  peres  sous  la  Loy:  car  voila  Iesus  Christ  qui  est  descendu  du  ciel,  et  alors  le  royaume  eternel  nous  a  este  ouvert:  il  y  est  monte  comme  en  nostre  personne:  car  il  est  ressuscite  en  ceste  nature  humaine  qu'il  avoit  prinse  de  nous.  Voila  donc  les  cieux  qui  sont  ouverts:  et  pourtant  il  ne  se  faut  point  maintenant  esbahir,  si  Dieu  parle  d'un  langage  plus  ample  qu'il  ne  faisoit  pas  du  temps  de  la  Loy.  Car  il  faloit  que  ce  peuple-la  fust  conduit  comme  nous  voyons  de  petis  enfans:  et  nous  sommes  venu  en  aage  d'homme  au  prix  et  en  comparaison  d'eux,  dit  8.  Paul.  Tant  y  a  que  nous  pouvons  recueillir  ici,  que  Dieu  voulant  inciter  les  siens  a  le  servir  de  meilleur  courage,  leur  dit,  quant  a  ce  monde,  il  se  monstrera  pere  envers  eux,  voire,  mais  non  pas  en  perfection  :  que  ce  sera  seulement  pour  leur  donner  quelque  goust  et  saveur  de  son  amour  paternelle,  afin  qu'ils  eslevent  les  yeux  de  leur  foy  plus  haut,  et  qu'ils  cognoissent  que  Dieu  leur  a  reserve  la  vraye  beatitude,  et  une  vraye  perfection  de  gloire,  quand  ils  seront  retirez  de  ce  monde,  et  de  ceste  vie  corruptible.  Voila  donc  en  somme  ce  que  nous  avons  a  recueillir  de  ce  passage:  et  mesmes  nous  avons  a  noter  ce  mot  qui  est  ici  mis:  Que  tu  sois  fortifie,  dit-il.  Or  par  cela  Moyse  declaire  que  Dieu  de  son  coste  est  fidele,  et  quand  il  a  dit  le  mot,  que  nous  en  devons  estre  bien  asseurez.  Mais  pource  que  nous  trainons  les  iambes,  encores  qu'il  nous  convie  tant  doucement,  encores  qu'il  approche  de  nous,  que  nous  sommes  lasches  et  froids  pour  venir  a  luy:  nous  avons  besoin  d'estre  fortifiez.  Voila  en  somme  ou  tendent  toutes  les  promesses  de  la  Loy.  Ce  n'est  pas  que  Dieu  s'oblige  comme  nostre  detteur,  ce  n'est  pas  qu'il  regarde  si  nous  avons  rien  merite  ou  non,  ce  n'est  pas  aussi  que  il  vueille  s'allier  avec  nous,  comme  s'il  prenoit  des  chevaux  a  loage,  et  dont  il  voulust  tirer  quelque  service  force:  mais  il  veut  en  somme  nous  fortifier,  voyant  que  nous  sommes  debiles,  voyant  que  nous  n'avons  pas  une  affection  si  resolue  comme  il  seroit  requis:  mais  que  nous  sommes  enveloppez  en  ce  monde,  que  nous  sommes  retardez  de  tant  de  vanitez,  et  mauvaises  affections  :  bref  nous  n'avons  pas  une  telle  legerete,  que  nous  venions  nous  rendre  a  son  obeissance:  il  nous  aide  en  cela,  il  voit  nostre  vice,  et  y  remedie.  Que  vous  soyez  donc  fortifiez.  Et  comment?  A  ce  que  vous  regardiez:  Or  ca,  nostre  Seigneur  nous  peut  commander  en  un  mot  precisement:  car  il  a  tout  empire  sur  nous,  et  de  nature  nous  sommes  siens:  et  quand  chacun  s'efforcera  de  toute  sa  puissance,