8:100  Le  Pere  (dit-il)  celuy  qui  me  les  a  donnees,  est  plus  grand  que  tous  (Iean  10,  29).  Et  c'est  ce  qu'il  nous  faut  bien  considerer  pour  batailler  contre  tant  de  tentations  que  Satan  nous  fait  pour  nous  divertir.  Car  autrement,  quand  nous  sommes  assaillis  de  toutes  parts,  que  nous  avons  cent  mille  morts  a  l'environ  de  nous,  quelle  sera  nostre  force  et  resistance?  Or  Dieu  est  invincible.  Sachons  donc  que  nostre  salut  est  certain.  Et  pourquoy  cela?  Pource  qu'il  est  en  la  main  de  Dieu.  Et  comment  en  sommes-nous  asseurez?  Pource  qu'il  l'a  mis  en  la  main  de  nostre  Seigneur  Iesus,  qui  nous  manifeste,  que  le  Pere,  qui  nous  a  esleus,  veut  avancer  son  conseil  a  plein  effect  et  perfection.  Au  reste,  nostre  Seigneur  Iesus  nous  monstre  bien  la  ce  que  nous  avons  desia  dit  plusieurs  fois,  et  qu'il  nous  faut  retenir:  c'est  assavoir,  que  Dieu  nous  fait  ses  brebis  [page  18],  voire  nous  ayans  esleus:  et  puis  il  nous  appele  a  son  troupeau:  le  moyen  de  nous  appeler  est  par  foy;  et  alors  nous  sommes  manifestez  et  declarez  brebis.  Car  la  vocation  qui  est  trouvee  en  l'Escriture,  n'est  sinon  le  tesmoignage  que  Dieu  rend  de  son  conseil,  qui  estoit  auparavant  cache:  comme  il  en  sera  tantost  parle  plus  a  plein.  Tant  y  a,  que  nous  sommes  brebis  de  Iesus  Christ  avant  de  l'avoir  cognu;  apres,  il  nous  appele  a  soy,  et  puis  nous  commencons  d'ouir  sa  voix.  Ce  que  sainct  Paul  en  traitte  au  9.  des  Romains,  est  encore  plus  clair.  Car  la  il  en  est  fait  une  resolution  toute  entiere,  voire  et  telle,  qu'on  ne  sauroit  repliquer  a  l'encontre.  Tout  ce  qu'il  nous  en  dit  est  manifeste.  Vray  est  que  Satan  s'est  tousiours  efforce  de  caviller  et  inventer  beaucoup  de  subtilitez  frivoles  pour  obscurcir  ce  qui  est  la  dit:  mais  la  verite  surmonte  tousiours,  quoy  qu'il  en  soit.  Sainct  Paul  monstre,  que  combien  qu'il  ait  choisy  les  enfans  d'Abraham  pour  estre  son  heritage,  toutesfois  que  tous  ceux  qui  sont  descendus  [page  19]  de  la  race  d'Abraham  selon  la  chair,  ne  sont  pas  enfans  de  la  promesse,  dit-il:  c'est  a  dire,  qu'ils  ne  sont  point  contenus  ne  compris  en  l'election  de  Dieu,  pour  dire  qu'ils  soyent  vrayement  heritiers  de  Dieu  et  de  son  Royaume.  Comme  si  maintenant  on  disoit,  que  Iesus  Christ  a  bien  este  ordonne  Roy  de  tout  le  monde,  afin  que  tous  viennent  luy  faire  hommage.  Comme  il  en  est  parle  en  tant  de  passages  des  Prophetes:  et  surtout  au  Pseaume  2,  que  i'allegue  comme  le  plus  notable  et  le  plus  commun.  Demande  moy,  et  ie  te  donneray  toutes  les  fins  de  la  terre  pour  ton  heritage.  (Ps.  2,  8.)  Depuis  le  soleil  levant  iusques  au  soleil  couchant  tu  seras  adore  des  rois  et  des  princes.  Voila  donc  comment  tout  le  monde  est  appele  a  salut,  au  Nom  de  nostre  Seigneur  Iesus  Christ:  mais  ce  n'est  pas  a  dire  pourtant  que  tous