58:100  regir,  et  que  nous  lui  soions  suiets.  Or  cependant  nous  trouverons  estrange  qu'il  est  ici  dit,  qu'Abraham  a  garde  les  commandemens,  les  statuts,  les  ordonnances  et  les  loix  du  Seigneur.  Il  n'y  avoit  pas  encore  un  seul  mot  par  escrit  de  toute  la  loy:  car  nous  savons  combien  de  temps  il  y  a  eu  entre  la  vocation  d'Abraham  et  la  Loy:  assavoir  quatre  cens  et  trente  ans.  Comment  donc  Dieu  dit-il  maintenant,  qu'Abraham  a  garde  ses  commandemens,  et  statuts,  et  ordonnances  et  loix?  C'est  comme  nous  avons  veu  par  ci  devant,  au  dixhuitieme  chapitre:  car  combien  qu'il  n'y  eust  encore  rien  d'escrit,  toutesfois  si  est  ce  qu'Abraham  n'a  pas  este  ignorant  de  ce  que  Dieu  a  enseigne  depuis  a  son  peuple.  Car  il  a  eu  deux  facons  diverses  de  gouverner  les  siens:  mais  ce  n'est  pas  que  de  son  coste  il  ait  este  muable.  Dieu  donc  n'a  pas  eu  tousiours  un  moyen  semblable  pour  enseigner  ses  fideles  :  mais  quoy  qu'il  en  soit,  il  n'a  iamais  eu  qu'une  regle,  soit  qu'elle  fust  escrite,  soit  qu'il  l'inspirast  a  ceux  qu'il  a  retenus  a  soy.  Ainsi,  combien  qu'Abraham  n'eust  pas  encore  de  Loy  escrite,  si  est-ce  qu'il  avoit  instruction  suffisante,  pour  savoir  comment  il  devoit  servir  a  Dieu.  C'est  donc  ce  que  nous  avons  a  retenir  sur  ce  passage.  Or,  quoy  qu'il  en  soit,  Dieu  cependant  monstre  que  si  nous  sommes  promps  a  lui  obeir  et  a  lui  estre  suiets,  que  de  son  coste  il  ne  nous  defaudra  iamais,  qu'il  ne  nous  monstre  le  chemin  auquel  nous  devons  marcher:  et  en  y  marchant,  nous  ne  pourrons  faillir.  Or  si  avant  qu'il  y  eust  iamais  Escriture,  Abraham  a  eu  statuts,  commandemens,  loix  et  ordonnances  :  auiourd'hui  par  plus  forte  raison,  quand  Dieu  s'est  declare  ainsi  familierement  par  Moyse,  qu'il  a  aiouste  encore  les  Prophetes,  afin  qu'il  y  eust  intelligence  plus  facile  de  la  Loy,  et  qu'il  a  parle  en  l'Evangile  si  clairement,  doutons-nous  qu'il  ne  face  office,  de  bon  Maistre  pour  nous  monstrer  tout  ce  qui  est  bon,  et  droit  et  iuste?  Mais  quoy?  L'ingratitude  du  monde  est  telle,  qu'on  ne  se  peut  assuiettir  ni  renger  a  lui:  et  c'est  autant  comme  si  les  hommes  vouloient  estre  sages  plus  qu'il  ne  leur  est  permis,  et  qu'ils  voulussent  avoir  une  sagesse  a  part,  et  comme  s'il  n'estoit  point  dit,  A  Dieu  seul  sage,  soit  honneur  et  gloire.  Quand  S.  Paul  dit,  que  Dieu  est  seul  sage:  ce  n'est  point  seulement  pour  lui,  mais  c'est  afin  que  nous  cerchions  en  lui  toute  sagesse.  Car  quand  nous  ne  voudrons  point  accepter  ceste  seule  regle  qu'il  nous  donne,  c'est  autant  comme  si  nous  disions,  Dieu  n'a  pas  seu  tout  ce  qui  nous  estoit  besoin,  il  faut  que  nous  inventions  de  nostre  cerveau  encore  plus:  pour  dire,  Et  ceci  sera  meilleur.  Et  quel  blaspheme  est  cela?  O  si  est-ce  que  quand  nous  servons  a  Dieu  en  telle  facon,  c'est  comme  lui  cracher  au  visage,  par  maniere  de  dire.  Ainsi  donc,  notons  que  quand  Moyse,  apres  avoir  parle  de  la