52:100  eum  ad  patrem:  adeoque  totum  Deum  in  ipso  amplectitur.  Est  interea  locus  memorabilis  ad  probandam  Christi  deitatem,  et  unam  cum  patre  essentiam.  Nam  praefatus  de  notitia  Dei,  mox  tam  ad  filium,  quam  ad  patrem  accommodat.  Unde  sequitur,  filium  cum  patre  eundem  esse  Deum.  3.  In  quo  sunt.  Particula  in  quo  vel  totam  illud  complexum  refert  de  agnitione  mysterii:  vel  ad  proximum  tantum  spectat,  nempe  Christum.  Tametsi  autem  parum  est  discriminis  inter  hoc  et  illud,  posterius  tamen  magis  placet  et  est  magis  receptum.  Sensus  est  igitur,  in  Christo  latere  thesauros  omnes  sapientiae  et  scientiae.  Quo  significat  nos  perfecte  sapere,  si  Christum  vere  cognoscimus:  adeo  ut  insania  sit,  praeter  ipsum  quidquam  scire  velle.  Nam  quum  pater  totum  se  in  illo  patefecerit:  extra  Deum  sapere  vult  qui  non  est  solo  Christo  contentus.  Si  de  mysterio  exponere  libeat,  sensus  erit,  totam  piorum  sapientiam  in  evangelio  inclusam  esse,  quo  nobis  Deus  in  filio  suo  revelatur.  Thesauros  autem  dicit  absconditos,  quia  non  eminent  magno  splendore  conspicui:  sed  potius  sub  crucis  humilitate  et  simplicitate  contemptibili  quasi  delitescunt.  Est  enim  semper  crucis  praedicatio  (ut  habuimus  ad  Corinthios)  mundo  stultitia.  Inter  sapientiam  et  intelligentiam  hoc  loco  non  pono  magnum  discrimen,  quia  tantum  duplicatio  ad  augendum  valet,  ac  si  dixisset,  nihil  alibi  posse  inveniri  scientiae,  eruditionis,  doctrinae,  sapientiae.  4.  Hoc  dico  ne  quis.  Quia  hominum  figmenta  (ut  postea  videbimus)  speciem  habent  sapientiae,  praeoccupatos  esse  oportet  piorum  animos  hac  persuasione,  satis  superque  unam  esse  Christi  notitiam.  Et  certe  haec  clavis  est  quae  ianuam  omnibus  pravis  erroribus  obserare  potest.  Quid  enim  in  causa  fuit  cur  tot  impiis  opinionibus,  tot  idololatriis,  tot  stultis  speculationibus  se  homines  implicuerint,  nisi  quia  despecta  evangelii  simplicitate  altius  adspirare  ausi  sunt?  Quidquid  ergo  errorum  est  in  papatu,  huic  ingratitudini  acceptum  ferri  debet,  quod  non  acquiescentes  in  uno  Christo,  alienis  doctrinis  se  dederunt.  Bene  itaque  apostolus  ad  Hebraeos,  dum  hortari  volens  fideles  ne  peregrinis  doctrinis  aut  novis  sinant  se  abduci,  hoc  primum  fundamenta  utitur,  Christus  heri  et  hodie,  et  in  saecula  (Hebr.  13,  8).  Quibus  verbis  significat,  extra  periculum  esse  qui  in  Christo  manent.  Omnibus  autem  fallaciis  et  deceptionibus  esse  expositos,  quibus  non  sufficit  Christus.  Ita  hic  Paulus,  quisquis  non  vult  decipi,  eo  principio  munitum  esse  vult:  non  esse  fas  homini  christiano,  quidquam  praeter  Christum  sapere.  Etiamsi  speciosissimum  habeat  colorem  quidquid  postea  angeretur,  nihil  tamen  fiet.  Nulla  denique  erit  pithanologia  quae  animos  eorum  vel  minimum  digitum  flectat,  qui  suam  mentem  Christo  addixerint.