44:100  factum  fuisse  quod  vicesimo  octavo  die  vel  circiter  missus  fuit  Haggaeus,  ut  revocaret  populum  a  torpore.  Unde  iterum  colligere  licet,  quam  necessarium  sit  nos  assidue  stimulari:  quia  mille  impedimenta  facile  reperiet  Satan,  quibus  nos  avertat  a  recto  cursu,  nisi  Deus  subinde  repetat  novas  exhortationes,  quae  animos  nostros  expergefaciant.  Elapsi  enim  fuerant  tantum  28  dies:  interea  cessasset  populus  ab  opere  nisi  missus  fuisset  iterum  hortator  Haggaeus.  Iam  notanda  est  causa  huius  cessationis,  cui  voluit  propheta  occurrere  ac  mederi.  Nam  prius  cessaverat  populus,  quia  singuli  plus  aequo  dediti  fuerant  suis  commodis.  Erat  autem  hoc  signum  foedae  ingratitudinis,  atque  etiam  profanae  impietatis.  Nam  ingratissimi  erant  Deo,  quibus  nulla  erat  cura  exstruendi  templi:  deinde  intolerabilis  fuit  impietas,  quod  vellent  habitare  in  domibus  suis  tabulatis:  non  contenti  mediocritate,  nisi  domos  suas  ornarent:  templum  autem  quasi  desertum  iaceret.  Sed  alia  fuit  ratio  quum  secundo  missus  est  Haggaeus:  qfuia  torpor  ille  oriebatur  ex  bono  principio,  et  sincero  pietatis  affectu.  Atque  etiam  hinc  videmus  quantus  artifex  sit  Satan,  qui  non  modo  palam  nos  abstrahit  ab  obsequio  Dei,  sed  se  insinuat  clandestinis  modis,  ut  sub  zeli  praetextu  deflectamus  a  cursu  vocationis  nostrae.  Qui  factum  est  ut  populus  pigresceret,  postquam  opus  inceperat?  nempe  quia  dolebat  senibus  longe  imparem  esse  gloriam  secundi  templi.  Nam  etsi  clangore  tubarum  plebs  sese  animaret,  senes  tamen  ipsi  suo  eiulatu  superabant  tubas.  Unde  hoc?  nempe  quemadmodum  dixi,  quia  videbant  non  respondere  templum  illud  veteri:  et  ideo  putabant  Deum  sibi  nondum  esse  propitium.  Si  dixissent  non  debere  fieri  tam  multos  sumptus  in  structura,  Deum  non  requierere  magnas  opes,  palam  detecta  fuisset  ipsorum  impietas.  Sed  quum  maxime  cuperent  talem  esse  splendorem  templi,  ut  possent  certo  statuere  adesse  ecclesiae  restitutionem,  qualis  promissa  fuerat  ab  omnibus  prophetis:  certe  videmus  fuisse  pium  ipsorum  affectum.  Sed  ita  monemur  cavendas  nobis  semper  esse  Satanae  insidias  etiam  in  specie  veritatis.  Quamvis  ergo  ad  pietatem  propensi  sint  animi  nostri,  semper  metuendus  est  Satan,  ne  clanculum  nobis  suggerat  quod  nos  avertat  a  nostra  vocatione:  sicuti  videmus  quosdam  deficere  ab  ecclesia,  quoniam  exigunt  summam  perfectionem.  Excandescunt  ad  vitia  quae  toleranda  sunt  nobis,  quia  corrigi  nequeunt:  ita  praetextu  zeli  sese  separant,  et  libenter  fabricarent  sibi  novum  mundum,  in  quo  esset  perfecta  ecclesia  et  arripiunt  etiam  testimonia  illa,  ubi  commendat  spiritus  sanctus  ecclesiae  puritatem  :  sicuti  quum  Paulus  dicit  (Eph.  5,  27)  acquisitam  fuisse  a  Christo,  ut  esset  sine  ruga  et  macula.  Sicuti  ergo  illi  rigido  suo  zelo  exasperantur,  ut  discedant  a  Deo  ipso,  et