10.1:100  a  sainct  Gervais  le  Mercredi,  avant  les  susdits  sermons  ordinaires.  Sensuit  du  second  ordre  ou  estats  que  nous  avons  nomme  des  Docteurs.  L'office  propre  des  Docteurs  est,  d'enseigner  les  fideles  en  saine  doctrine:  afin  que  la  purete  de  l'Evangile  ne  soit  corrompue  ou  par  ignorance,  ou  par  mauvaises  opinions.  Toutesfois  selon  -que  les  choses  sont  auiourd'huy  disposees,  nous  comprenons  en  ce  titre  les  aides  et  instrumens  pour  conserver  semence  a  l'advenir,  et  faire  que  l'Eglise  ne  soit  desolee  par  faute  de  Pasteurs  et  Ministres.  Ainsi,  pour  user  d'un  mot  plus  intelligible,  nous  l'appelerons  l'Ordre  des  escoles.  Le  degre  plus  prochain  au  Ministere  et  plus  conioint  au  gouvernement  de  l'Eglise,  est  la  lecture  de  Theologie:  dont  il  sera  bon  qu'il  y  en  ait  au  vieil  et  nouveau  Testament.  Mais  pour  ce  qu'on  ne  peut  profiter  en  telles  lecons,  que  premierement  on  ne  soit  instruict  aux  langues  et  sciences  humaines,  et  ainsi  est  besoin  de  susciter  de  la  semence  pour  le  temps  advenir,  afin  de  ne  laisser  l'Eglise  deserte  a  nos  enfans:  il  faudra  dresser  college  pour  les  instruire,  et  preparer  tant  au  Ministere  que  au  gouvernement  civil.  De  la  facon  d'y  proceder  elle  se  trouvera  au  livre  de  l'Ordre  des  Escoles.  [page  17]  Qu'il  n'y  ait  autre  Escole  par  la  ville  pour  les  petits  enfans,  mais  que  les  filles  ayent  leur  Escole  a  part  comme  il  a  este  fait  par  cidevant.  Sensuit  ie  troisieme  ordre,  qui  est  des  Anciens,  commis  ou  deputez  par  la  Seigneurie  au  Consistoire.  Leur  office  est  de  prendre  garde  sur  la  vie  d'un  chacun,  d'admonester  amiablement  ceux  qu'ils  verront  faillir  et  mener  vie  desordonnee.  Et  la  ou  il  en  seroit  mestier,  faire  rapport  a  la  compagnie  qui  sera  deputee  pour  faire  les  corrections  fraternelles,  et  lors  les  faire  communement  avec  les  autres.  Comme  ceste  Eglise  est  disposee,  qu'on  en  eslise  deux  du  Conseil  estroit,  quatre  du  Conseil  des  soixante,  et  six  du  Conseil  des  deux  cents,  gens  de  bonne  et  honneste  vie,  sans  reproche  et  hors  de  toute  suspecon,  sur  tout  craignans  Dieu,  et  ayans  bonne  prudence  spirituelle:  et  les  faudra  tellement  eslire  qu'il  y  en  ait  en  chacun  quartier  de  la  ville,  afin  d'avoir  l'oeil  par  tout.