50:10  obtrectationes  pseudoapostolorum.  Haec  enim  est  mundi  pravitas,  ut  martyriis,  quae  suspicere  cum  admiratione  debuerat,  insultet:  atque  in  magnificis  piorum  trophaeis  contumeliae  materiam  venetur.  Benedictus,  inquit,  Deus.  Cur?  qui  consolatur  nos.  Relativum  positum  vice  causalis  particulae.  Pertulerat  forti  et  alacri  animo  suas  tribulationes.  Hanc  fortitudinem  adscribit  Deo:  quia  eius  consolatione  suffultus  non  succubuerit.  Vocat  autem  patrem  Domini  nostri  Iesu  Christi,  non  abs  re,  quum  de  beneficiis  agitur  :  nam  ubi  non  est  Christus,  illic  nulla  Dei  beneficentia.  Rursum  ubi  intercedit  Christus,  per  quem  omnis  cognatio  nominatur  in  coelo  et  in  terra,  illic  et  omnes  misericordiae  et  omnes  consolationes  Dei,  imo  illic  paternus  amor:  ex  quo  fonte  reliqua  omnia  perfluunt.  4.  Ut  possimus  consolari.  Nec  dubium  est  quin  sicuti  nuper  a  probro  et  sinistris  rumoribus  suas  afflictiones  vendicavit:  ita  Corinthios  admoneat,  quod  coelesti  consolatione  victor  evasit,  factum  esse  ipsorum  bono  et  gratia:  ut  se  potius  ad  tolerantiae  societatem  animent  quam  fastuose  despiciant  eius  certamina.  Caeterum  ut  non  sibi  vivebat  apostolus,  sed  ecclesiae:  ita  quidquid  gratiarum  in  ipsum  conferebat  Deus,  non  sibi  soli  datum  reputabat,  sed  quo  plus  ad  alios  iuvandos  haberet  facultatis.  Et  certe  Dominus  quum  nobis  benefacit,  suo  exemplo  nos  quodammodo  invitat  ut  simus  in  proximos  liberales.  Non  igitur  supprimendae  sunt  spiritus  divitiae:  sed  quod  quisque  accepit,  in  alios  transferat.  Valere  quidem  praecipue  hoc  debet  in  verbi  ministris:  commune  tamen  omnium  est  pro  cuiusque  mensura.  Ita  hic  Paulus  se  Dei  consolatione  sustentatum  fuisse  agnoscit  ut  aliis  consolandis  ipse  sufficeret.  5.  Quia  sicut  abundant.  Bifariam  potest  exponi  haec  sententia:  active  et  passive.  Si  active  accipias,  sensus  erit:  quo  magis  exerceor  variis  afflictionibus,  eo  maior  alios  consolandi  facultas  mihi  suppetit.  Sed  mihi  passivus  sensus  magis  arridet:  quod  pro  mensura  tribulationum  Deus  suas  consolationes  multiplicet.  Quod  etiam  David  sibi  testatur  (Psal.  94,  19)  accidisse:  Pro  multitudine  anxietatum  mearum  intra  me,  consolationes  tuae  laetificaverunt  animam  meam.  Sed  in  verbis  Pauli  doctrina  plenior:  nam  piorum  afflictiones  vocat  passiones  C  h  r  i  s  t  i  :  sicuti  alibi  (Coloss.  1,  24)  dicit,