48:10  sibi  ipse  suo  arbitrio  praeter  nostram  opinionem  et  supra  ingenii  nostri  captum  moderanda  sumpsit.  8.  Accipietis  virtutem.  Quod  optimum  fraenandae  curiositati  remedium  erat,  Christus  eos  revocat  tam  ad  Dei  promissionem  quam  ad  mandatum.  Curiositas  fere  ex  otio  et  diffidentia  nascitur:  diffidentiae  medetur  promissionum  meditatio.  Mandata,  ubi  nos  et  nostra  studia  deceat  occupari,  ostendunt.  Iubet  ergo  discipulos  patienter  exspectare  quod  Deus  promisit,  et  intentos  esse  ad  munus  quod  Deus  iniunxit  exsequendum.  Interea  nimiam  eorum  festinationem  perstringit  quod,  nondum  spiritu  sancto  donati,  quae  propria  sunt  eius  dona  praepostere  anticipant.  Neque  enim  id  est  recta  via  ingredi,  quum  ad  militandum  vocati  essent,  velle  omissis  laboribus  molliter  quiescere.  Quum  ergo  dicit:  Accipietis  virtutem,  eos  suae  imbecillitatis  admonet,  ne  ante  tempus  sectentur  ea,  quae  consequi  nequeunt.  Utrumque  legi  potest:  Accipietis  virtutem  spiritus:  aut,  Veniente  in  vos  spiritu.  Secundum  tamen  melius  convenit:  quia  plenius  eorum  defectum  exprimit,  donec  spiritus  superveniat.  Eritis  mihi  testes.  Duos  hac  una  voce  errores  corrigit.  Nam  et  prius  esse  pugnandum  significat  quam  adspirent  ad  triumphum  :  et  aliam  regni  Christi  naturam  esse  docet  quam  putarent.  Eritis  ergo  mihi  testes:  hoc  est,  agricolam  laborare  oportet,  antequam  fructum  percipiat.  Hinc  colligamus,  in  viam  qua  pervenitur  ad  regnum  Dei  coniiciendos  nunc  esse  oculos  potius  quam  ut  de  statu  futurae  vitae  subtiliter  philosophemur.  Inquirunt  multi,  qualis  olim  futura  sit  sua  beatitudo,  quum  in  coelum  recepti  fuerint:  quomodo  autem  illuc  saltem  accedant,  nulla  illis  cura  est.  Atqui  in  primis  renuntiandum  erat  mundo.  Disputant  de  qualitate  futurae  vitae,  quam  habituri  sunt  cum  Christo:  interim  non  cogitant  mortis  eius  oportere  nos  esse  participes,  ut  postea  cum  eo  vivamus.  Insistat  igitur  quisque  in  opere  praesenti:  militemus  omnes  strenue  sub  Christo:  constanter  et  indefessis  animis  in  cursu  vocationis  nostrae  pergamus:  fructum  Deus  in  tempore  proferet.  Sequitur  altera  correctio,  ubi  testes  sibi  fore  asserit.  Hac  enim  voce  falsam  de  regno  terreno  imaginationem  excutere  voluit  discipulis:  quia  breviter  significat  in  evangelii  praedicatione  consistere.  Non  est  igitur  cur  opes,  delitias,  externam  potentiam,  aut  quidquam  terrenum  somnient,  dum  audiunt  tunc  regnare  Christum,  ubi  per  evangelii  doctrinam  sibi  mundum  subiugat.  Unde  sequitur,  spiritualiter  ipsum,  non  iuxta  rationem  mundi,  imperare.  Quod  autem  de  carnali  regno  animis  praesumpserant  apostoli,  ex  communi  totius  gentis  errore  fluxit.  Nec  vero  mirum  est,  hac  in  parte  omnes  fuisse  hallucinatos.  Primum  enim  quum  illud  metimur  sensu  nostro,  quid  possumus  nisi  crassum  et  terrestre  concipere?  Huc  accedit,  quod