47:10  a  mundo,  quin  homines  eius  radiis  expergefacti  in  ipsum  attollere  oculos  debuerint.  Unde  sequitur,  culpam  illam  imputandam  esse.  11.  In  sua  venit.  Hic  vero  prorsus  deplorata  hominum  pravitas  et  malitia,  hic  plus  quam  scelerata  impietas  apparet,  quod  quum  filius  Dei  se  in  carne  conspicuum  exhibuit,  et  quidem  Iudaeis,  quos  sibi  Deus  ab  aliis  gentibus  velut  in  peculium  segregaverat  :  non  tamen  agnitus  nec  receptus  fuit.  Hunc  etiam  locum  varie  exponunt.  Aliqui  enim  promiscue  de  toto  mundo  evangelistam  putant  loqui,  et  certe  nulla  est  .pars  mundi  quam  non  sibi  iure  vindicet  Dei  filius.  Sensus  ergo  est  secundum  illos:  quum  Christus  in  mundum  descendit,  non  in  alienos  fines  ingressum  esse,  quia  totum  genus  humanum,  propria  erat  eius  haereditas.  Sed  rectius  sentiunt  meo  iudicio,  qui  referunt  ad  solos  Iudaeos.  Subest  enim  tacita  comparatio,  qua  magis  exaggerat  evangelista  hominum  ingratitudinem.  Filius  Dei  sibi  in  una  gente  domicilium  elegerat:  quum  illic  apparuit,  reiectus  est.  Hinc  ergo  clare  perspicitur  quam  malitiosa  sit  hominum  caecitas.  Hoc  autem  omnino  dicendum  fuit,  ut  scandalum  tolleret  evangelista,  quod  multis  tunc  obiicere  poterat  Iudaeorum  incredulitas.  Quum  enim  spretus  ac  repudiatus  esset  ab  ea  gente,  cui  nominatim  promissus  fuerat:  quis  illum  putasset  totius  mundi  redemptorem?  Ideo  videmus  quantopere  in  hac  parte  laboret  Paulus.  Caeterum  tam  in  verbo  quam  in  nomine  subest  emphasis.  Ubi  prius  erat  filius  Dei,  illuc  eum  evangelista  dicit  venisse.  Significat  ergo  novum  et  extraordinarium  praesentiae  modum,  quo  se  filius  Dei  manifestavit,  ut  illum  homines  propriore  intuitu  conspicerent.  Quum  dicit  in  swa,  Iudaeos  aliis  gentibus  comparat:  quia  singulari  privilegio  in  Dei  familiam  cooptati  erant.  Christus  ergo  se  illis  primo  obtulit  tanquam  domesticis,  et  qui  peculiari  iure  ad  eius  imperium  pertinebant.  Eodem  spectat  illa  Dei  querimonia  apud  Iesaiam:  Bos  cognoscit  possessorem  suum,  asinus  praesepe  domini  sui:  Israel  autem  me  non  cognovit  (les.  1,  3).  Quamvis  enim  totius  orbis  habeat  imperium,  se  tamen  peculiarem  Israelis  Dominum  facit,  quem  velut  in  sacrum  ovile  collegerat.  12.  Quotquot  autem.  Ne  quos  moretur  hoc  obstaculum,  quod  Christum  Iudaei  contempserint  ac  respuerint,  pios  qui  in  ipsum  credunt  supra  coelum  attollit  evangelista.  Dicit  enim  fide  hanc  gloriam  consequi,  ut  filii  Dei  censeantur.  Et  in  particula  universali  Quotquot  subest  antithesis.  Caeca  enim  gloriatione  Iudaei  efferebantur,  ac  si  soli  Deum  haberent  sibi  obstrictum.  Pronuntiat  ergo  evangelista  mutatam  esse  sortem:  quia  abdicatis  Iudaeis  gentes  in  vacuum  locum  succedant.  Perinde  est  enim  ac  si  ius  adoptionis  ad  extraneos  transferret.  Hoc  est,  quod  dicit  Paulus,  interitum  populi  unius  vitam  totius  mundi