46:10  10  guise  rien  en  la  purete  qui  est  yci  contenue.  Et  voyla  aussi  pourquoy  notamment  S.  Paul  recommande  qu'on  suyve  le  droit  fil,  et  le  pourtrait  de  sa  doctrine:  comme  s'il  disoit,  qu'il  ne  suffit  pas  qu'on  retienne  la  substance,  mais  qu'on  recognoisse  une  telle  conformite,  que  ce  soit  comme  si  la  predication  de  Timothee  avoit  este  iettee  en  moule,  pour  estre  accomparee,  et  pour  avoir  une  vraye  similitude  a  celle  de  S.  Paul,  et  des  autres  Apostres.  Mais  il  adiouste  aussi,  qu'il  la  commette  entre  mains  de  gens  fideles.  Et  pourquoy?  Il  prevoyoit  la  nonchalance  qui  estoit  aux  hommes,  qui  laissent  escouler  ce  que  Dieu  leur  a  donne  pour  leur  bien,  et  pour  leur  salut,  et  les  autres  ne  demandent  sinon  de  s'avancer  par  leur  ambition,  les  autres  de  s'enrichir  par  leur  avarice,  comme  desia  nous  avons  touche.  Ainsi  il  est  plus  que  requis  qu'il  y  ait  comme  des  thresoriers  de  ceste  doctrine  de  grace  et  de  salut,  lesquels  en  facent  bonne  garde,  et  qu'ils  ne  permettent  point  que  iamais  elle  s'evanouisse,  ne  qu'elle  s'efface  de  la  memoire  des  hommes.  Et  voyla  pourquoy  S.  Paul  aussi  dit,  que  l'Eglise  est  la  fermete,  et  comme  le  pilier  de  la  verite  de  Dieu.  Et  comment?  La  verite  de  Dieu  est-elle  soustenue  des  hommes,  qui  s'addonnent  a  toutes  vanitez,  et  lesquels  n'ont  nulle  fermete  en  eux?  C'est  par  ce  moyen,  c'est  ascavoir  qu'il  y  en  ait  tousiours  quelques  uns  reservez  pour  estre  docteurs  au  nom  de  Dieu,  pour  nous  distribuer  le  thresor  de  salut,  et  pour  ne  souffrir  point  qu'on  introduise  ni  faux  metail,  ni  faux  aloy,  ni  fausse  monnoye  en  forme,  ni  en  substance,  et  qu'on  n'y  desguise  rien.  Voyla  donc  ce  que  nous  avons  a  observer  quant  a  ce  que  S.  Luc  addresse  maintenant  son  propos  a,  un  seul  homme.  Et  ainsi  apprenons  chacun  en  son  degre  et  sa  condition,  de  non  seulement  recevoir  la  doctrine  de  l'Evangile,  mais  aussi  d'en  faire  bonne  garde,  et  qu'elle  ne  soit  point  corrompue,  qu'elle  demeure  sans  changement,  et  sans  variete,  et  qu'on  scache  que  c'est  comme  si  de  l'eau  estoit  tiree  de  sa  pure  fontaine,  en  laquelle  il  n'y  eust  nul  bourbier  mesle  parmi.  Voyla  ce  que  nous  avons  a  retenir.  Or  quant  a  ce  que  S.  Luc  adiouste,  qu'il  est  utile  que  celuy  auquel  il  escrit,  c'est  ascavoir  Theophile,  ait  la  fermete  et  asseurance  des  choses  dont  il  avoit  este  enseigne:  en  cela  il  nous  est  monstre  que  iamais  nous  n'aurons  si  bien  proufite  en  la  foy,  que  nous  n'ayons  besoin  de  confirmation  nouvelle  de  iour  en  iour.  Il  n'y  a  nulle  doute  que  Theophile,  qui  est  yci  loue  et  prise  comme  par  la  bouche  du  S.  Esprit,  n'ait  este  excellent,  comme  une  perle  entre  les  autres,  qu'il  n'ait  este  des  plus  avancez,  en  sorte  qu'il  pouvoit  monstrer  le  chemin  a  tout  le  commun  peuple.  Or  combien  qu'il  eust  tant  proufite,  combien  qu'il  peust  estre  comme  un  miroir  9