39:10  deinde  scripsisse  alias  tabulas,  quae  apertae  manerent.  Postea  addit,  se  utrasque  dedisse  scribae  suo  Baruch,  cuius  postea  fiet  iterum  mentio:  et  pluribus  locis.  Dedi  igitur  eas  Baruch  filio  Neriae  filii  Maassiae  coram  oculis  Chanameel,  et  oculis  testium,  qui  scripti  erant  in  tabulis^  et  coram  oculis  omnium  qui  illic  adstabant,  nempe  ad  atrium  custodiae.  Hinc  rursum  colligere  promptum  est,  narrari  veram  historiam,  et  non  nudam  visionem,  quae  exhibita  fuerit  prophetae:  adfuit  igitur  venditor  Chanameel  una  cum  testibus,  et  aliis  Iudaeis.  Dicit  se  librum  dedisse  cum  mandatis.  Nam  alioqui  fuisset  inanis  libri  traditio:  si  tantum  deposuisset  in  manibus  Baruch  tabulas  illas,  populus  nihil  didicisset.  Sed  adduntur  mandata:  Praecepi  coram  oculis  ipsorum^  dicendo,  hinc  etiam  statuere  licet  oraculum  fuisse  datum  prophetae,  non  tantum  quod  apud  posteros  vigeret,  nempe  post  completum  tempus  exsilii:  sed  ut  iam  tunc  esset  celebre,  et  innotesceret  omnibus  Iudaeis.  Dicit  igitur  Iehovam  ita  loqui.  Nondum  ostendit  finem  prophetiae:  sed  quum  pronuntiat  negotium  hoc  geri  Dei  mandato,  iam  attentos  reddit  omnium  animos.  Sume  ergo  has  tabulas,  inquit,  et  repone  eas  in  vase  testaceo,  vel  fictili.  Mirum  est  cur  non  iubeat  reponere  potius  in  alio  vase.  Nam  poterat  vas  illud  corrumpi,  et  ita  periissent  tabulae.  Sed  scimus  etiam  pretiosissimas  quosque  thesauros  in  vasis  fictilibus  recondi.  Non  mirum  igitur  est,  si  Deus  iusserit  prophetiam  hanc  reponi  in  vase  testaceo.  Si  quis  subtilius  malit  accipere,  vas  testaceum  erit  promissio,  quae  in  speciem  parum  erat  firma.  Quid  enim  est  fragilius,  quam  vox  quae  in  aerem  spargitur?  Iudaei  tracti  fuerunt  in  exsilium:  audierant  ex  ore  Ieremiae  finem  praefixum  esse  ad  septuaginta  annos.  Sed  interea  poterant  concidere  animis,  quum  tantum  sonitus  vocis  perculisset  ipsorum  aures.  Quidquid  sit,  etiam  si  in  vase  testaceo  repositum  fuerit  oraculum,  quod  erat  pignus  liberationis,  salvum  tamen  stetit  et  incorruptum,  quia  ex  Dei  mandato  illic  reconditus  fuerat  ille  thesaurus.  Dicit,  ut  perstet  ad  multos  dies,  quibus  verbis  significat  non  modo  hoc  vaticinium  utile  fore  Iudaeis,  qui  paulo  post  trahendi  erant  in  captivitatem,  sed  etiam  eorum  posteris,  qui  nondum  nati  erant:  atque  ut  scirent,  etiam  se  mortuis,  firmum  esse  vaticinium:  quia  non  debemus  metiri  fidem  Dei  vitae  nostrae  modulo.  Nihil  enim  magis  caducum  est  vita  nostra,  quae  statim  diffluit,  veritas  autem  Dei  aeterna  est.  Haec  igitur  ratio  cur  diserte  addita  fuerit  haec  particula,  debere  hoc  vaticinium  servari  in  vasis  testaceis,  ut  maneret  salvum  et  integrum  ad  multos  dies,  hoc  est,  donec  liberaret  Deus  populum  suum.  Quanquam  satis  tenemus  sensum  superioris  vaticinii,  tamen  breviter  etiam  perstringere  con-  9