35:10  mais  cognoissons  qu'il  y  a  mesure  en  tout  ce  qu'il  fait,  et  qu'il  n'est  point  excessif:  a  fin  que  cela  nous  apprenne  de  nous  renger  paisiblement  a  sa  volonte.  Et  mesmes  quand  Dieu  ne  nous  punira  point  pour  le  regard  de  nos  pechez,  sachons  que  c'est  autant  de  grace  qu'il  nous  fait,  que  c'est  un  privilege  especial  qu'il  nous  donne:  car  il  auroit  tousiours  iuste  raison  de  nous  punir  encores  que  nous  fussions  les  plus  iustes  du  monde.  Or  est-il  ainsi  que  nous  sommes  bien  loin  d'une  telle  perfection.  Qu'est-ce  donc  que  Dieu  nous  pourroit  faire?  Cependant  s'il  nous  visite  pour  esprouver  nostre  patience,  qu'il  nous  face  mesme  ceste  grace  de  souffrir  pour  son  nom,  encores  qu'il  nous  peust  chastier  pour  nos  pechez:  cognoissons  qu'il  nous  fait  un  trop  grand  honneur,  et  la  dessus  humilions  nous:  et  qu'un  chacun  en  son  endroit  ait  ceste  modestie-la  de  dire,  Et  bien,  ie  voudroye  que  Dieu  me  traittast  d'une  autre  facon,  et  me  semble  bien  qu'il  passe  mesure  en  m'affligeant:  mais  si  est-ce  que  ie  cognoy  qu'il  ne  le  fait  point  sans  cause,  et  si  ce  n'est  pour  mes  pechez  qu'il  m'afflige,  c'est  autant  de  grace  qu'il  me  fait:  car  i'en  ay  merite  d'avantage  :  et  pourtant  il  faut  que  ie  baisse  la  teste  me  submettant  du  tout  a  sa  bonne  volonte.  Voila  donc  comme  Dieu  sera  glorifie  par  nous,  et  que  nous  luy  attribuerons  la  iustice  qui  est  sienne:  c'est  a  savoir  quand  nous  aurons  la  bouche  close,  comme  aussi  sainct  Paul  en  traitte  au  troisieme  des  Romains  (v.  19):  A  fin,  dit-il,  que  toute  bouche  soit  close,  et  que  tout  le  monde  se  cognoisse  redevable  a  Dieu,  et  que  luy  seul  soit  iustifie.  Comment  est-ce  que  Dieu  sera  iustifie  par  nous  selon  sainct  Paul?  A  savoir  quand  nous  demeurerons  tous  condamnez,  et  que  nous  n'aurons  point  ceste  hardiesse  de  nous  rebecquer  contre  luy:  mais  que  nous  confesserons  librement  que  nous  luy  sommes  tous  redevables.  Si  donc  nous  en  venons  la,  alors  Dieu  sera  iustifie,  c'est  a  dire  sa  iustice  sera  approuvee  de  nous  avec  telle  louange  qu'elle  mente.  Mais  au  contraire,  si  les  hommes  s'eslevent  et  qu'ils  ne  cognoissent  point  qu'ils  sont  redevables  pour  se  condamner,  et  qu'ils  ne  confessent  la  dette  de  laquelle  ils  sont  obligez  devant  Dieu:  combien  qu'ils  protestent  de  vouloir  iustifier  Dieu,  c'est  a  dire  de  le  confesser  iuste,  si  est-ce  neantmoins  qu'ils  le  condamnent.  Au  reste,  quand  il  est  dit,  qu'Eliu  a  este  ainsi  enflamme,  notons  qu'il  y  a  grande  difference  entre  un  courroux  qui  procedera  d'un  zele  de  Dieu,  et  celuy  que  chacun  de  nous  aura,  ou  pour  ses  biens,  ou  pour  son  honneur,  ou  pour  le  regard  de  soy.  Car  celuy  qui  se  courrouce  et  se  despite  d'une  passion  privee,  n'a  nulle  excuse:  et  encores  qu'il  allegue  que  sa  cause  est  bonne:  tant  y  a  qu'il  offense  Dieu  en  se  courroucant:  car  nous  sommes  trop  aveugles  en  nos  passions.  Voila