34:10  ie  doy  concevoir:  car  Dieu  me  presse  d'une  facon  si  estrange,  que  si  ie  parle,  ie  ne  fay  qu'augmenter  ma  douleur:  si  ie  me  tay,  il  n'y  a  nul  allegement  pour  moy.  Me  voila  donc  comme  un  homme  englouti  en  toutes  afflictions.  Voila  en  somme  ce  que  veut  dire  Iob  :  que  soit  qu'il  parle,  ou  se  taise,  ii  n'est  allege  en  facon  que  ce  soit.  Voila  aussi  comme  David  se  complaint  au  Pseaume  32  (v.  3)  que  son  mal  l'a  tellement  presse  et  angoisse  qu'il  ne  sait  que  devenir,  ne  quel  remede  y  cercher.  Quand,  dit-il,  ie  me  suis  lamente,  et  que  i'ay  cuide  par  ce  moyen-la  avoir  quelque  adoucissement  de  ma  douleur,  le  feu  s'est  allume  d'avantage.  Si  i'ay  eu  la  bouche  close,  et  que  ie  me  soye  la,  voulu  comme  abbatre  devant  Dieu,  aussi  bien  mon  coeur  s'est  tormente,  et  comme  descire  par  pieces:  et  lors  ma  douleur  m'a  presse  si  vivement,  qu'elle  ne  s'est  point  restreinte  pour  cela.  Et  en  l'autre  passage  il  dit  (Pse.  39,  2),  qu'il  avoit  conclu,  cependant  que  les  meschans  avoyent  la  vogue,  de  ne  sonner  mot,  d'estre  la  comme  un  muet.  Mais  quoy?  dit-il,  ie  n'ay  peu  me  tenir  en  ce  propos  :  car  quand  i'ay  voulu  ainsi  me  restreindre,  en  la  fin  il  a  fallu  que  les  bouillons  esclatassent.  Comme  un  pot,  quand  le  feu  sera  grand,  combien  qu'on  le  couvre,  il  faut  que  les  escumes  sortent  de  quelque  coste  que  ce  soit.  Or  ceci  est  bien  digne  d'estre  note.  Car  quand  Dieu  nous  envoye  quelque  maladie,  ou  quelque  povrete,  lors  il  nous  semble  que  iamais  homme  n'a  este  si  rudement  traitte  que  nous:  et  voila  qui  est  cause  de  nous  mettre  en  desespoir,  ou  de  nous  inciter  a  toute  impatience,  et  que  nous  venons  aussi  a  nous  eslever  contre  Dieu,  ou  bien  il  nous  semble,  que  les  fideles  qui  ont  este  devant  nous,  combien  que  Dieu  les  affligeast,  n'estoyent  pas  tant  infirmes  comme  nous,  mesmes  qu'ils  n'ont  eu  nulles  passions.  Et  cela  aussi  est  cause  de  nous  augmenter  nostre  torment.  Et  pourtant  retenons  ce  qui  est  ici  dit,  c'est  assavoir,  Que  Dieu  a  tellement  presse  les  siens,  ceux  (di-ie)  qu'il  aimoit,  et  desquels  il  avoit  le  salut  cher  et  precieux:  il  les  a  toutes  fois  amenez  iusqu'a  ceste  extremite-la,  qu'ils  n'avoyent  plus  de  contenance,  ils  ne  savoyent  parler,  ne  se  taire.  David  ne  fait  point  une  telle  confession  sans  cause,  mais  c'est  pour  la  doctrine  de  tous  enfans  de  Dieu.  Car  quand  nous  voyons  qu'un  homme  rempli  de  telle  vertu,  ayant  une  telle  constance  du  sainct  Esprit,  neantmoins  est  mis  iusques  au  bas,  et  qu'il  ne  sait  ce  qu'il  a  a  faire,  qu'il  est  comme  au  bout  de  son  sens:  faisons-en  nostre  profit,  et  si  Dieu  nous  envoye  des  tentations  si  dures,  que  nous  soyons  iusques  au  bout,  que  nous  n'en  puissions  plus:  et  bien,  que  cela  ne  nous  soit  point  nouveau,  car  nous  ne  sommes  pas  les  premiers.  David  nous  monstre  le  chemin,  et  il  est  sorti  d'une  telle  fange,  Dieu  lui  a  tendu  la  main,  et  apres  qu'il  l'a  humilie