27:10  nous  fussions  enseignez  d'icelle,  non  seulement  il  nous  a  presente  sa  Loy  escrite  en  deux  pierres:  mais  il  a  reforme  nos  coeurs,  et  les  a  amollis:  qu'au  lieu  qu'il  n'y  avoit  que  durte,  il  les  a  attirez  a  une  obeissance  pour  recevoir  paisiblement  ce  qui  nous  est  annonce  en  son  nom,  voire,  si  nous  sommes  des  siens.  Car  tous  ceux  ausquels  l'Evangile  est  presche  ne  sont  pas  de  ce  nombre:  mais  qu'un  chacun  s'examine,  et  nous  cognoistrons  que  Dieu  envoyant  son  Evangile  pour  nous  estre  annonce,  qu'il  est  prest  et  appareille  de  nous  donner  sa  grace,  sinon  que  l'empeschement  vienne  de  nostre  coste.  Il  est  vray  que  son  election  domine  tousiours:  mais  si  est-ce  que  les  hommes  ne  laissent  point  d'estre  coulpables,  quand  l'Evangile  ne  profitera  point  en  eux:  comme  S.  Paul  le  declaire,  qu'il  faut  bien  que  le  diable  nous  ait  aveugle  les  yeux,  quand  nous  ne  voyons  point  la  clarte  qui  y  reluit,  veu  que  l'image  de  Dieu  se  monstre  la  si  evidemment.  Notons  donc  que  si  Moyse  a  reproche  au  peuple  des  Iuifs,  et  a  bon  droict,  l'ingratitude  dont  il  estoit  coulpable:  que  maintenant  nous  devons  bien  baisser  les  yeux,  et  demeurer  en  subiettion,  et  estre  du  tout  abbattus  devant  Dieu.  Et  pour  cela  nous  avons  dequoy  magnifier  la  grace  de  nostre  Dieu  d'avantage  que  n'ont  point  eu  les  peres  anciens  du  temps  que  la  Loy  leur  a  este  escrite  seulement  en  deux  tables  de  pierre.  Au  reste,  nous  avons  aussi  a  noter  la  figure  de  ce  qui  est  dit:  Que  tu  polisses  deux  tables,  et  que  tu  me  les  apportes:  car  par  cela  Dieu  declaire  quel  est  l'ordre,  et  la  droite  procedure  pour  estre  bien  enseignez  de  luy:  c'est  assavoir  que  nous  luy  apportions  les  tables  ou  il  doit  escrire  sa  Loy,  qu'elles  soyent  polies:  et  que  puis  apres  il  escrive.  Il  est  vray  que  nous  ne  ferons  point  cela  de  nostre  mouvement  propre,  il  faut  bien  qu'il  nous  y  conduise  par  son  S.  Esprit:  mais  il  nous  faut  noter  qu'il  y  a  deux  graces  distinctes  que  Dieu  nous  fait.  L'une  c'est  quand  il  nous  previent,  a  ce  que  nous  soyons  prests  et  prompts  a  luy  rendre  obeissance:  et  puis  la  seconde  grace  est,  quand  il  nous  illumine,  et  qu'il  nous  donne  une  affection  presente  de  le  servir,  apres  que  nous  avons  cogneu  sa  volonte.  Ceci  seroit  obscur,  s'il  n'estoit  cogneu  plus  au  long:  mais  i'espere  qu'il  nous  sera  tantost  bien  facile.  Devant  que  les  hommes  soyent  amenez  a  la  foy,  et  qu'ils  cognoissent  quelle  est  la  doctrine  de  l'Evangile,  pour  estre  retirez  de  toute  ignorance,  ils  pourront  avoir  desia  un  bon  preparatif  de  dire:  Helas!  ie  demande  d'escouter  mon  Dieu,  seulement  qu'il  me  monstre  son  bon  plaisir,  et  me  voici  prest  pour  le  recevoir,  et  il  me  conduira  ou  il  luy  plaira:  seulement  qu'il  mette  la  bride  sur  mon  col,  qu'il  me  tourne  et  de  coste  et  d'autre,  et  ie  le  suyvray,  ie  m'assuiettiray  a  luy  en  toute  obeissance.