25:10  here  maledictionem:  cui  subscribere  iussi  sunt  Israelitae,  ut  omnes  sine  exceptione  perditos  se  agnoscerent,  quum  essent  maledictione  impliciti.  Et  hodie  simili  desperatione  nos  omnes  ad  unum  percelli  necesse  est,  ut  Christi  gratiam  amplexi  solvamur  ab  hoc  tristi  reatu:  quandoquidem  factus  est  pro  nobis  maledictus,  ut  a  maledictione  legis  nos  redimeret.  EX  DEUT.  XI.  26.  Vide,  ego  pono  coram  vobis  hodie  benedictionem  et  maledictionem.  27.  Benedictionem,  si  obedieritis  praeceptis  Iehovae  Dei  vestri,  quae  ego  praecipio  vobis  hodie:  28.  Maledictionem  vero,  si  non  obedieritis  praeceptis  Iehovae  Dei  vestri,  sed  recesseritis  e  via  quam  ego  praecipio  vobis  hodie,  ut  ambuletis  post  deos  alienos  quos  non  novistis.  29.  Quumque  introduxerit  te  Iehova  Deus  tuus  in  terram  quam  tu  ingrederis  ut  possideas  eam,  tunc  dabis  benedictionem  super  montem  Garizim,  et  maledictionem  super  montem  Ebal.  30.  Annon  sunt  trans  Iordanem  post  viam  ad  occasum  solis  vergentem  in  terra  Chananaei,  qui  habitat  in  planitie  e  regione  Gilgal,  iuxta  campestria  Moreh?  31.  Vos  enim  transituri  estis  Iordanem,  ut  pergatis  ad  possidendam  terram  quam  Iehova  Deus  vester  dat  vobis,  et  haereditabitis  eam,  et  habitabitis  in  ea.  32.  Custodite  ergo  ad  faciendum  omnia  statuta^  et  iudicia,  quae  ego  pono  ante  faciem  vestram  hodie.  26.  Vide,  ego.  Nunc  utrumque  simul  complectitur,  beatos  fore  si  studium  suum  applicent  ad  legem  servandam:  maledictos  vero,  si  excusso  eius  iugo  in  suis  cupiditatibus  lasciviant.  Quod  autem  dicit  se  proponere  illis  benedictionem  et  maledictionem,  tantundem  valet,  ac  si  testatus  esset,  non  simpliciter  se  docere  quid  rectum  sit,  sed  paratam  esse  mercedem  si  obediant:  sin  minus,  poenam  quo'que  instare.  Ita  videmus,  quam  hactenus  tradidit  doctrinam,  spe  et  metu  obsignari  :  quia  neque  operam  ludent  parendo,  nec  impune  eam  repudiabunt.  Caeterum  ut  promissiones  certo  amplecti  et  minas  timere  discant,  repetit  quod  antea  vidimus,  Deum  esse  legis  autorem,  qui  et  fidelis  remunerator  est,  et  severus  iudex:  simul  tamen  ministerium  suum  commendat,  quia  sic  oportuit  ipsos  ab  uno  Deo  pendere,  et  acquiescere  eius  mandatis,  ut  se  tamen  eius  prophetae  subiicerent.  Ea  est  enim  hominum  superbia,  ut  Dei  audiendi  causa,  supra  nubes  volitare  appetant,  ipse  autem  in  servis  suis,  quorum  ore  loquitur,  vult  audiri.  Ad  hanc  ergo  modestiam  rursus  eos  assuefacit  Moses,  ubi  se  praecipere  refert  quae  Deus  mandavit,  ac  si  se  vocaret  spiritus  sancti  organum.