24:10  Stephani  apud  Lucam)  nulla  ratio  sinit.  Nec  mirum  est,  in  notulis  quae  numeros  signant,  vel  in  una  litera  obrepsisse  hunc  errorem.  Quod  si  quis  contentiosus  rixandi  ansam  captet,  meminerimus  non  frustra  vetare  spiritum,  per  os  Pauli,  ne  occupemur  circa  genealogias  (1.  Tim.  1,  4).  6.  Mortuus  vero  est  Ioseph.  Inscite  colligunt  ex  hoc  loco  Rabini:  Ioseph  primum  ex  fratribus  mortuum  fuisse:  quia  quum  solus  tunc  excelleret,  nomen  eius  diserte  exprimi  honoris  causa,  aliis  praeteritis,  apparet.  Quanto  tempore  fuerint  patri  superstites,  non  narrat  Moses:  sed  initium  mutationis  tantum  notat:  ac  si  diceret,  humaniter  tractatos  fuisse  Israelitas  longo  temporis  spatio,  ut  tolerabilis  fuerit  eorum  conditio  qui  descenderant  cum  Iacob,  quia  ab  omni  iniuria  et  tyrannide  immunes,  hospitio  sibi  concesso  tranquille  fruebantur.  Simul  admonet,  potuisse,  aetate  illa  consumpta,  emori  apud  posteros  desiderium  et  memoriam  terrae  Chanaan,  quam  nunquam  conspexerant,  nisi  violenter  ad  eam  expetendam  expergefacti  essent.  Et  certe  ut  in  meditandis  Dei  beneficiis  obliviosus  et  socors  erat  populus  ille,  non  potuit  eius  saluti  melius  consuli,  quam  ubi  Deus  crudeliter  illum  vexari  affligique  passus  est:  alioqui,  perinde  ac  si  oriundus  esset  ex  Aegypto,  perpetuum  illic  nidum  optasset  :  qua  desidia  in  eorum  cordibus  obliterata  fuisset  spes  haereditatis  promissae.  7.  Porro  creverunt  filii.  Quousque  excreverint,  duodecimo  capite  narrat  Moses,  nempe  ad  sexcenta  usque  millia,  exceptis  pueris  et  mulieribus.  Incredibile  certe  augmentum  tam  exiguo  tempore.  Nam  quum  anni  inter  foedus  cum  Abraham  percussum  et  populi  exitum  numerentur  quadringenti  triginta,  dimidiam  vero  partem  effluxisse  constet  antequam  Iacob  in  Aegyptum  descenderet:  inde  conficitur,  ducentis  tantum  annis,  vel  paulo  plus,  hoc  est  annis  decem  vel  circiter,  Israelitas  fuisse  inquilinos  illius  terrae.  Qui  ergo  fieri  potuit,  ut  tam  exiguo  tempore  excresceret  familia  una  in  tot  myriadas?  Larga  fuisset  ac  insolita  multiplicatio,  si  ex  ima-